बुटवल — जनता समाजवादी पार्टीले लुम्बिनी प्रदेशका आफ्ना कुनै पनि सांसदलाई कारबाही नगरेको बताएको छ । लुम्बिनी प्रदेश सभाले जसपाको पत्रअनुसार प्रदेश सभा सदस्यबाट निस्कासन गरेको सूचना जारी गरेलगत्तै जसपाका अध्यक्ष महन्थ ठाकुरको यस्तो धारणा आएको हो ।
सभामुखका नाममा विज्ञप्ति जारी गर्दै अध्यक्ष ठाकुरले प्रदेशमा पार्टी समायोजन नभएकाले कुनै पनि सांसदलाई कारबाही नभएको जानकारी गराएका हुन् । उनले लुम्बिनी प्रदेशमा पूर्वराजपा नेपाल र संघीय समाजवादी फोरमको समायोजन हुन नसकी जसपा नेपालको प्रदेश समिति गठन हुन बाँकी रहे पनि जसपा नेपालका ६ सदस्यीय संसदीय दल गठन भई कार्यरत रहेकोले यसैलाई स्वायत्तता दिई प्रदेससभासम्बन्धी सम्पूर्ण काम लोकतान्त्रिक प्रक्रियाबाट गर्न गराउन भनिएको छ ।
यस्तै जसपा वरिष्ठ नेता महतोले आधिकारिक निर्णयबिना नै लुम्बिनी प्रदेशका आफ्ना सांसद हटाएर फर्जी काम भएको आरोप लगाएका छन् । उनले संचारकर्मीसँग कुराकानी गर्दै पार्टीको कुनै कमिटीले आधिकारिक निर्णय नगरी कारबाहीका लागि गरिएको सिफारिसलाई सभामुखले स्वीकृत गर्नु गलत रहेको दाबी गरेका छन् ।
वैशाख ६ मा मुख्यमन्त्री शंकर पोखरेलविरूद्ध अविश्वास प्रस्तावमा हस्ताक्षर गरेका ३ सांसदसहित जसपाका ४ जना मन्त्री बनेका थिए । मन्त्री बनेका सन्तोष पाण्डे, विजयबहादुर यादव, कल्पना पाण्डे र सुमन शर्मा रायमाझीलाई जसपाको सिफारिसमा निस्कासन गरेको लुम्बिनी प्रदेश सचिवालयले सूचना निकालेको छ ।
जसपामा अध्यक्ष महन्थ ठाकुर र वरिष्ठ नेता राजेन्द्र महतो पक्षले भने मन्त्री बनेका सांसदहरूको स्वागत गरेका थिए । संघीय परिषद् अध्यक्ष बाबुराम भट्टराई र अध्यक्ष उपेन्द्र यादव पक्षले भने मन्त्रीबाट राजीनामा नदिए कारबाही गर्ने चेतावनी दिएका थिए ।
संसदीय दलमा र निर्वाचन आयोगमा भने दुवै दल आधिकारिक रूपमा एक भइसकेका छन् ।