कात्तिक २४, कञ्चनपुर – तिहारको दिनमै कञ्चनपुरको बेदकोट नगरपापलिका–१० राना दैजीका तीन जनाको घर जङ्गली हात्तीको झुण्डले भत्काइदिएको छ ।
गएराति शिवराज राना, खेमराज राना, प्रेम सिंह राना लगायत तीन जनाको घर हात्तीको झुण्डले भत्काएको हो । हात्तीले घर भत्काइ भण्डारण गरेर राखेको धान, चामल, पिठो, गहुँ लगायतको अन्न सबै खाएको छ । लुगा, कागजपत्र बाकस, ग्यास सिलिण्डर, दराज, पङ्खा, टिभी लगायतका सामग्री समेत पूरै तोडफोड गरेको छ । घर नजिक लगाएको तरकारी नष्ट गर्नाका साथै खानेपानीका लागि गाडिएको नल्कासमेत हात्तीको झुण्डले उखेलेको छ ।
राति १२ बजे २० भन्दा बढीको सङ्ख्यामा रहेको हात्तीको झुण्ड शुक्लाफाँटा राष्ट्रिय निकुञ्जबाट बस्ती छिरेको हो । हात्तीको झुण्डले घर भत्काउन थालेपछि बालबालिकासहित ज्यान जोगाउन घर छाडेर भागेको स्थानीय शिवराज रानाले बताउनुभयो ।
“बिहान घरमा पुग्दा घर भत्काइएको थियो”, उहाँले भन्नुभयो, “घरभित्र राखेको सबै अन्न खाइदियो । लुगाफाटो समेत च्यातचुत पारेर विचल्लीमा पारेको छ ।” “ज्यान त बल्लतल्ल जोगायौँ, घर जोगाउन सकिएन,” उहाँले भन्नुभयो । अन्न सबै हात्तीले खाएपछि बिहान छिमेकीले दिएको खाना खाएर बसेको अर्का खेमराज रानाले बताउनुभयो । उहाँले भन्नुभयो, “हात्तीले बिजोग पा¥यो । खाना समेत अरुबाट मागेर खानु परेको छ ।”
खेतमा धान छँदा खाएर नोक्सान गर्दै आएको हात्तीले घरभित्र राखेको धान लगायतका अन्न समेत खाएर नोक्सान गर्न थालेपछि स्थानीय बासिन्दा त्रसित भएका छन् । हात्ती नियन्त्रणका लागि भरपर्दो व्यवस्था गरिदिन यस क्षेत्रका बासिन्दाले माग गरेका छन् ।
यसैबीच आज बिहान सुदूरपश्चिम प्रदेशका सदस्य लालबहादुर खड्काले हात्तीले घर भत्काएका परिवारको अवस्था र क्षतिको जानकारी लिनुभयो । उहाँका अनुसार हात्तीको झुण्डले तीन वटै परिवारको अन्न सबै खाएर र घरभित्र राखेको लुगाफाटोसमेत नष्ट गरेको छ । खड्काले भन्नुभयो, “हात्तीपीडित परिवारको अवस्था निकै नाजुक छ । तत्काल राहत र बस्ने व्यवस्था मिलाउन पहल भइरहेको छ ।”
रासस
