काठमाडौं । एकदिवसीय क्रिकेटमा नेपालले पहिले ब्याटिङ गर्दै विपक्षीलाई अहिलेसम्मकै ठूलो टार्गेट दिएको थियो ।घरेलु मैदान र दर्शकको साथ थियो । तर ब्याटिङ चलेको खेलमा बलिङ चलेन, अनि २४९ रन बनाएर पनि हार बेहोर्न बाध्य भयो ।
प्रसंङ्ग हो आईसीसी क्रिकेट विश्वकप लिग २ अन्तर्गत काठमाडौंमा भइरहेको त्रिकोणात्मक सिरिजको । नेपाल फेरि ओमानसँग पारजित भयो । आइतबार त्रिवि क्रिकेट मैदान, कीर्तिपुरमा घरेलु दर्शकका अगाडि नेपालले राम्रो ब्याटिङ गर्दा राम्रो बलिङ गर्न सकेन ।
टस हारेपछि पहिले ब्याटिङ गरेको नेपालले कप्तान ज्ञानेन्द्र मल्लको अर्धशतक मद्दतमा ८ विकेट गुमाएर ५० ओभरमा २४९ रन बनाएको थियो ।तर ओमानका उपकप्तान अकिब इल्यासले शतक र कप्तान जिसन मक्सुदले अर्धशतक प्रहार गरेपछि नेपालले ठूलो स्कोर बनाउँदा पनि हार बेहोर्यो । ओमानले ४७.२ ओभरमा मात्र २ विकेट गुमाएर लक्ष्य पूरा गर्यो ।अघिल्लो खेलमा नेपालले ओमानलाई १९७ रनमा रोकेपनि १७९ रन मात्र बनाउँदै १८ रनको हार बेहोरेको थियो । यस पटक ओमानका लागि नायक बनेका इल्यासले बलिङमा ४ विकेट लिए भने ब्याटिङमा अविजित १०९ रन बनाए । उनले १०८ बल खेल्दै १२ चौका र १ छक्का प्रहार गरे । यस्तै कप्तान मकसुदले ७९ बल खेल्दै ८ चौका मदद्तमा अविजित ७९ रन बनाए ।
ओडीआईमा पहिलो शतकसँगै इल्यासले टीयू मैदानमा ढोगे ।